Пєсње Благограда | Pěsnje Blagograda
Тут вы можете послушати нєкторе пєснје из повєдкы Тајны Благограда | Tut vy možete poslušati něktore pěsnje iz povědky Tajny Blagograda.
| Заклинанје кавкы Туто чувство тебе мори, како љуты хлад, Твоја мука изчезаје и ујде назад, Једин момент, другы момент — он пошел на спад, Не је страшны и не важны тобє выше глад! 2025 | Zaklinanje kavky Tuto čuvstvo tebe mori, kako ljuty hlad, Tvoja muka izčezaje i ujde nazad, Jedin moment, drugy moment — on pošel na spad, Ne je strašny i ne važny tobě vyše glad! 2025 |
| Пєсња Славице В души давно имам идеју И всакы дењ ја помњу ју, Не обрви моју надєју, Не изгуби моју мечту. Зачто не хчеш остановити Мој непомочны давны бєг? Чему не хчеш ме пољубити И быти разом цєлы вєк? Моја мечта и глас љубовны Помогут нам свезати се. Убєгти можеш ты, но помни, Неможно скрыти се од се. 2025 | Pěsnja Slavice V duši davno imam ideju I vsaky denj ja pomnju ju, Ne obrvi moju naděju, Ne izgubi moju mečtu. Začto ne hčeš ostanoviti Moj nepomočny davny běg? Čemu ne hčeš me poljubiti I byti razom cěly věk? Moja mečta i glas ljubovny Pomogut nam svezati se. Uběgti možeš ty, no pomni, Nemožno skryti se od se. 2025 |
| Тасма Добра дєвицо, јасно солнечко Дары наше — к твојеј радости, Дај нам тасмочку, младоженачко, За успєхы наше и за мудрости! 2025 | Tasma Dobra děvico, jasno solnečko Dary naše — k tvojej radosti, Daj nam tasmočku, mladoženačko, Za uspěhy naše i za mudrosti! 2025 |
| Плач по косє (Дєвчинскы вечер) В послєдњи вечер В мојеј избици Пријатељкы-дєвкы Пєвајут как птице. Разплетајут косу И дєлет на двє, Ја плачу, а милы Мој даже не вє. Ој, вєтре-вєтриче, Не дми ты под праг, А солзы однеси За тридевет драг… Повинна jесм быти Под красным дубом, В бєлој кошуљи С чрвеным обрубом. Печ пали се жарко, А в срдцу јест хлад И душа все хоче Вратити назад. Ој, вєтре-вєтриче, Не дми ты под праг, А солзы однеси За тридевет драг… Ја просим те, мати, Себе објави, Ты встани на прагу И благослови. Ты, дєтетко, родно, Мене не зови, Давно уже јесм Во хладној земји. Ој, вєтре-вєтриче, Не дми ты под праг, А солзы однеси За тридевет драг… 2025 | Plač po kosě (Děvčinsky večer) V poslědnji večer V mojej izbici Prijateljky-děvky Pěvajut kak ptice. Razpletajut kosu I dělet na dvě, Ja plaču, a mily Moj daže ne vě. Oj, větre-větriče, Ne dmi ty pod prag, A solzy odnesi Za tridevet drag… Povinna jesm byti Pod krasnym dubom, V běloj košulji S črvenym obrubom. Peč pali se žarko, A v srdcu jest hlad I duša vse hoče Vratiti nazad. Oj, větre-větriče, Ne dmi ty pod prag, A solzy odnesi Za tridevet drag… Ja prosim te, mati, Sebe objavi, Ty vstani na pragu I blagoslovi. Ty, dětetko, rodno, Mene ne zovi, Davno uže jesm Vo hladnoj zemji. Oj, větre-větriče, Ne dmi ty pod prag, A solzy odnesi Za tridevet drag… 2025 |
| Сватба под дубом Под солнцем јасным, на природє Стојиш ты тут из вєка в вєк, Ты знајеш всечто о свободє Какој не вєдаје чловєк. Идемо вокруг, тепло наших рук Нас буде свезати тасмами пруг, Да буде навєкы наше житје Чистєјше и красно как твоје бытје. Дуб силны јест как муж пригодны, Как нєжна жена брєза јест, Наш пут до вашего подобны И јесмо мы из тутых мєст. Будемо мы все прєвозојдти, Љубов и вєра — наша лод, Трикратно будемо обојдти, Да бы створити једин род. 2025 | Svatba pod dubom Pod solncem jasnym, na prirodě Stojiš ty tut iz věka v věk, Ty znaješ vsečto o svobodě Kakoj ne vědaje člověk. Idemo vokrug, teplo naših ruk Nas bude svezati tasmami prug, Da bude navěky naše žitje Čistějše i krasno kak tvoje bytje. Dub silny jest kak muž prigodny, Kak něžna žena brěza jest, Naš put do vašego podobny I jesmo my iz tutyh měst. Budemo my vse prěvozojdti, Ljubov i věra — naša lod, Trikratno budemo obojdti, Da by stvoriti jedin rod. 2025 |